శ్రీ పరాభవనామ ఉగాది శుభాకాంక్షలు !

కడలియలయై పరాభవ కదిలి వచ్చె,
గతము దిగమ్రింగి కొంగ్రొత్త కాంతి దెచ్చె,
భవితపై యాశ చివురించి పరిఢవిల్ల,
సకలశుభములు కలిగించు సర్వులకును.

బ్రతుకుసారమంత పచ్చడిలో జూపి,
కష్టసుఖముల సమదృష్టి నేర్పి,
విజయమొందనాత్మ విశ్వాసమిచ్చు ను
గాది పండుగ యని ఘనత గాంచె.

గల్ఫులో చిచ్చు జగమంత కమ్ముకొనియె,
గ్యాసు పెట్రోలు లేక యిక్కట్టు లాయె,
రాకపోకలాగె పనులు లేకపోయే,
పొయ్యి వెలగక పస్తులు పోవు టాయె.

బలమదంబు హెచ్చ ప్రపంచ మేలదలచి,
కౄరదాడుల దేశాలు కూలగొట్టు,
ట్రంపు నణగించు ఘోర పరాభవమ్ము,
నీ పరాభవవత్సరంబిచ్చు కనుడి

క్రొత్త సంవత్సరము తీర్చు కోర్కె లెల్ల,
నాయు రారోగ్య సౌభాగ్య మంద జేయు,
దయయు ధర్మమ్ము చేబూను జయము కల్గు,
సంశయించక ముందుకు సాగి పొమ్ము.

రాగం పలికింది (వీడియో) !

గిట్టుధర

వెలనీక రైతు భూమికి,
వెలనీయక నీటివనరు విద్యుత్తులకున్
వెలనీయక కష్టమునకు,
వెలగట్ట పంటకెటులొ విజ్ఞులకెరుకౌ!

వెల వెక్కిరింత తాలక,
కులబోసిరి పంట దార్ల కోపము రగులన్,
తలచిన కూలియు రాదని,
పొలముననే వదలి రైతు బోరున పొగిలెన్.

గిట్టుధర రైతు కిచ్చిన,
పెట్టున ద్రవ్యోల్బణము పెట్రేగనుచున్,
కట్టడి చేయు దొరల కను,
గట్టదె పారిశ్రమపరి కపటపు చేతల్?

నేతల కోతలు, ప్రభుతల
చేతలు సుంతయిన మేలు చేయక పోయెన్.
ఘాతుక దళారి బాధల,
రైతులు కూలిపని కోర్చి రకటా ధరణిన్!

ఉత్తుతి బాసలు సేయక,
చిత్తముతో భద్రభూమి, స్థిరజలవనరుల్,
విత్తన,విద్యుతు మేలుగ
రైతుకొసగు చాలు,రామరాజ్యము రాదే!

అయ్యో, బాబు !

అయ్యో, బాబు ! అన్యాయానికి బలియైపోతివా?
అక్రమ కేసుల్లోబడి యిరుక్కుపోయితివా !
నేరస్తులు గద్దెనెక్కి పరిపాలన సాగిస్తూ,
నీతిపరుల బంధించి జైలుపాలు చేస్తారా?

జీవనాడి పోలవరానికి జవసత్వాల నందించి
భవితపైన భరోసాను ప్రజలలోన కలిగించి
అమరావతి రాజధాని కంకురార్పణ గావించి
ఆంధ్ర నగ్రగామిజేయ అహర్నిశం శ్రమించావే

నీ దక్షత, దార్శనికత, నిష్కలంక సేవలను
కోరుకున్న ఆంధ్రావని నీకండగ వెంట నిలచెను
మబ్బుల మాటున చంద్రుడు మసకబారినను
గాలిసోకి తొలగిపోవ గగనమంత కాంతి వెలుగును

తిక్కన, తిరుపతి వేంకటకవుల ప్రఖ్యాత పద్యాలకు సవరణ

 జనబాహుళ్యంలో ప్రచారంలో ఉన్నట్లు ద్రౌపది ఆరవ భర్తగా కర్ణున్ని స్వీకరిస్తుందని శ్రీకృష్ణుడు ఏనాడూ అనలేదు. 

శ్రీ మల్లాది చంద్రశేఖరశాస్త్రి గారి వివరణ ఈ క్లిప్ లో వినండి.(19 నిమిషాల నుండి 41 నిమిషాల వరకు)

శ్రీ గరికపాటి నరసింహారావు గారి వివరణ ఈ  వీడియోలో వినండి (28:10 నిమిషాల నుండి ) 

ద్రౌపది ఆరవ భర్తగా కర్ణున్ని స్వీకరిస్తుందని శ్రీకృష్ణుడు చెప్పాడనే అపవాదుకి మూల కారణం సంస్కృత భారతంలోని శ్లోకంలో "షష్ఠేకాలే" అనే పదాన్ని అర్థం చేసుకోవడంలో జరిగిన పొరపాటు.  దీనివల్ల చాలా ధార్మిక నష్టం కలిగింది. శ్రీ మల్లాది చంద్రశేఖరశాస్త్రి గారి, శ్రీ గరికపాటి నరసింహారావు గారి వివరణలు విన్న తర్వాత ఆ పొరపాటును సరిద్దుకోవలసిన అవసరం ఉందనిపించింది . ఆ పొరపాటే జరుగక పోయినట్లైతే మహాభారతంలో "పాంచాల రాజపుత్రియు.." పద్యం, దానిననుసరించి వచ్చిన పాండవోద్యోగములోని " ఏ సతి వహ్నిలోన.." పద్యం ఏ విధంగా వ్రాయబడియుండేడివో అని ఆలోచించాను. కవిబ్రహ్మ శ్రీ తిక్కన సోమయాజి గారికి, కవీశ్వరులైన తిరుపతి వేంకటకవులకు నమస్కరించి, వారి  శైలి, సరళత, నడత, భావగాంభీర్యత, సహజ నాటకీయతా ఔచిత్యములకు భంగము కలుగకుండా వారి పద్యాలకు సవరణ చేయుటకు సాహసించాను. 

 
తిక్కన భారతంలోని ఉద్యోగపర్వం -చతుర్దాశ్వాసంలో శ్రీకృష్ణుడు చెప్పిన పద్యం ఇది.

పాంచాల రాజపుత్రియు,
నంచితముగ నిన్ను బొందునారవ వరుసన్,
సంచితపుణ్యుడ వీవొక
ఇంచుకయును వేరుసేయ కేతెమ్మెలమిన్.

ఈ పద్యంలో రెండవ పాదం మాత్రం  నేను యిలా సవరించాను.

పాంచాల రాజపుత్రియు,
నంచితముగ కొల్చు భక్తి నభిషేకమునన్,
సంచితపుణ్యుడ వీవొక
ఇంచుకయును వేరుసేయ కేతెమ్మెలమిన్.

 తిరుపతి వేంకటకవుల ప్రఖ్యాతి వహించిన పద్యం.."ఏ సతి వహ్నిలోన జనియించెను" పద్యానికి కూడా సవరణ చేయవలసిన అవసరం ఏర్పడింది.

అసలు పద్యం 

ఏసతి వహ్నిలోన జనియించెను జన్నమొనర్చు వేళ, ము
న్నేసతి పెండ్లినాడు నృపులెల్ల పరాజితులైరి క్రీడిచే,
నేసతి మీది మోహమున యింతలు జేసిరి రాజు నీవు? ని
న్నాసతి పెండ్లియాడ గల దారవ భర్తగ సూర్యనందనా !

నేను ప్రయత్నించి పై పద్యంలోని రెండవ పాదంలో ' పెండ్లినాడు '  పదాన్ని మరియు చివరి రెండు పాదాలను తగు విధంగా సవరించాను. సవరించిన మార్పులతో పద్యం క్రింద చూడగలరు.

సవరించిన పద్యం 

ఏసతి వహ్నిలోన జనియించెను జన్నమొనర్చు వేళ, ము
న్నేసతి బెండ్లియాడ నృపులెల్ల పరాజితులైరి క్రీడిచే,
నేసతి యీసడించెను, వరించను సూతుని నేనటంచు;ని
న్నాసతి భక్తిగొల్చు వసుధాధిపు జేయగ సూర్యనందనా !

 దీనిపై మీ అమూల్యమైన అభిప్రాయాలను తెలుపవలయునని సవినయంగా కోరుచున్నాను. 

అన్నమాచార్య నాటకం డౌన్లోడ్ చేసుకోండి

శ్రీ బెల్లంకొండ రత్నం గారు రచించిన 'అన్నమాచార్య ' నాటకాన్ని ఇక్కడి నుండి డౌన్లోడ్ చేసుకోండి .

ఈ నాటకం 2013లో జరిగిన గరుడ రాష్ట్ర స్థాయి నాటకోత్సవాలలో "ఉత్తమ రచన" అవార్డు పొందింది. నాటకాన్ని చదివి మీ విలువైన అభిప్రాయాలను కామెంట్ల రూపంలో తెలుపగలరు.

Annamacharya (S) (Natakam 2013) by Bellamkonda Ratnam on Scribd

స్మృత్యంజలి

శ్రీ బెల్లంకొండ రత్నం గారు వారి నాన్నగారి పై వ్రాసిన శతకం ఇది. ప్రతి పద్యంలోను వారి నాన్నగారి మీద ఆయనకున్న అవ్యాజమైన అనురాగం, వారితో ఆయన పంచుకున్న మధురానుభూతులు, చెరిగిపోని జ్ఞాపకాలు ప్రతిఫలిస్తాయి.

Smruthyanjali by Rathnam Bellamkonda

రుక్మిణీ కళ్యాణం నాటకం డౌన్లోడ్ చేసుకోండి !

శ్రీ బెల్లంకొండ రత్నం రచించిన రుక్మిణీ కళ్యాణం నాటకం ఇక్కడి నుండి డౌన్లోడ్ చేసుకోండి.

Rukmini Kalyanam by Rathnam Bellamkonda

చెట్టే మనిషికి జీవనాధారము !

 

 

 

చెట్టే మనిషికి జీవనాధారము
చెట్లను పెంచితే కలుగు సౌభాగ్యము
చెట్టే మనిషికి జీవనాధారము
చెట్లను పెంచితే కలుగు సౌభాగ్యము
చెట్టే మనిషికి జీవనాధారము
చెట్లను పెంచితే కలుగు సౌభాగ్యము

మండుటెండ మరపించి నీడ సేదనలరించు
మేఘాలను మురిపించి వర్షాలను కురియించు
మండుటెండ మరపించి నీడ సేదనలరించు
మేఘాలను మురిపించి వర్షాలను కురియించు
కాలుష్యము హరియించి ప్రాణవాయువందించు..ఆ..ఆ
కాలుష్యము హరియించి ప్రాణవాయువందించు
అన్న,వస్త్ర, మౌషధమై ఆయువృద్ధి గావించు
అన్న,వస్త్ర, మౌషధమై ఆయువృద్ధి గావించు

                                               || చెట్టే మనిషికి 

అందం ఆనందం అభివృద్ధికి చెట్లాధారం
చెట్టు లేని ఎడారిలోన మోడు వారు జనజీవం
అందం ఆనందం అభివృద్ధికి చెట్లాధారం
చెట్టు లేని ఎడారిలోన మోడు వారు జనజీవం
పచ్చదనం విస్తరించి ఫలపుష్పభరితమై ..ఆ..ఆ
పచ్చదనం విస్తరించి ఫలపుష్పభరితమై
భువి నందనవనమైతే
దివి నేలకు దిగు తథ్యం
భువి నందనవనమైతే
దివి నేలకు దిగు తథ్యం

                                         || చెట్టే మనిషికి

చెట్టే సంపద

 

 

 

చెట్టే  సంపద హోయ్

చెట్టే దేవతా హోయ్

చెట్లు పెంచితే చింత తీరు రా 

చెట్లు పెంచితే చింత తీరు రా ..హె హేయ్

చెట్టే  సంపద హోయ్

చెట్టే దేవతా హోయ్

చెట్లు పెంచితే చింత తీరు రా 

చెట్లు పెంచితే చింత తీరు రా 

చెట్లు పెంచితే చింత తీరు రా 

లాయి లల్లాయి లే

లాయి లల్లాయి లే హేయ్

లాయి లల్లాయి లే

లాయి లల్లాయి లే 

                                                      || చెట్టే  సంపద

విత్తు మొదలుగా వేరు చివురును

వేయి విధముల కాయపడతది

విత్తు మొదలుగా వేరు చివురును

వేయి విధముల కాయపడతది

పరుల కొరకే బ్రతుకునంతయూ

పరుల కొరకే బ్రతుకునంతయూ ధారపోసెడి త్యాగి వృక్షము

పరుల కొరకే బ్రతుకునంతయూ ధారపోసెడి త్యాగి వృక్షము

పరుల కొరకే బ్రతుకునంతయూ ధారపోసెడి త్యాగి వృక్షము

                                                      || చెట్టే  సంపద

ఎంత చేసినా ఏమి ఇస్తివని

ఈదులకీడ్చే మనుషుల కన్నా..హె...హేయ్

ఎంత చేసినా ఏమి ఇస్తివని

ఈదులకీడ్చే మనుషుల కన్నా

పెంచిన చెట్టే మంచి చేస్తది హా...అఆ

పెంచిన చెట్టే మంచి చేస్తది

అవసరాలలో ఆదుకొంటది

పెంచిన చెట్టే మంచి చేస్తది

అవసరాలలో ఆదుకొంటది

పెంచిన చెట్టే మంచి చేస్తది

అవసరాలలో ఆదుకొంటది

                                                      || చెట్టే  సంపద  

వడ్డీకిస్తే అసలూడిందని

లబోదిబోయని అఘోరించకు

వడ్డీకిస్తే అసలూడిందని

లబోదిబోయని అఘోరించకు

చెట్లను పెంచి ప్రోది చేస్తివా హా...అఆ

చెట్లను పెంచి ప్రోది చేస్తివా 

ఇబ్బడి ముబ్బడి రాబడిస్తది

చెట్లను పెంచి ప్రోది చేస్తివా 

ఇబ్బడి ముబ్బడి రాబడిస్తది

                                                   || చెట్టే  సంపద

పర్యావరణ రక్షణ

చుట్టు పరిసరాలు  శుభ్రముగా ఉంచుకో !
చెట్టు చేమలతో పచ్చదనం నింపుకో !
ప్రకృతి సమతుల్యం పదిలంగా చూసుకో !
భువిని నీ ఉనికి కి భద్రతిదే తెలుసుకో !

విచ్చలవిడి విసర్జన వ్యాధులంట జేయును,
పారవేయు చెత్తలోన సిరులు పొందవచ్చును,
మట్టిగానీ ప్లాస్టీకులు వలదు, హాని కలుగును,
ముందుచూపు ఉంటె చాలు మనుగడ సుఖవంతమౌను,

వాహన పరిశ్రమల వెలువడు వాయువులు,
సేల నీటి వనరుల కలయు విషపదార్థములు,
సకల జీవరాసులు సమసిపోవు ప్రమాదములు,
శాస్త్రీయ నిర్వహణల సమకూరును  శుభములు,

అడవుల స్వార్థానికి ఆహుతిగా చేయకుము,
సామాజిక వనవృద్ధికి సహకరించ మరువకుము,
పర్యావరణ రక్షణలో పుడమి తల్లి క్షేమము,
పుడమి తల్లి వొడిలొనే మన బ్రతుకులు పదిలము.

ఛాయచిత్రం-4 - శ్రీ వేంకటేశ్వరుడు

 

చదువుకుందాం

 చదువుకుందాం చదువుకుందాం
మనమందరం చదువుకుందాం
చదువులు బాగా చదువుకొని 
ప్రగతిబాటలో పయనిద్దాం   || చదువు

ఆడమగయను తేడాలేక
పేదాసాదను భేదములేక
అందరు ఓకటని ఆనందముగ
ఆడుచుపాడుచు హాయిగ నవ్వుచు   || చదువు

తెలివితేటలను పెంచును చదువు
కలిమిబలిమి కలిగించును చదువు
పేరుప్రతిష్ఠల తెచ్చును చదువు
సుఖశాంతుల సమకూర్చును చదువు   || చదువు

కరుణ ప్రేమగల హృదయమె హృదయము
సత్య ధర్మ సద్వర్తనమే దైవము
మానవత్వమును మించిన మతము
జగతిని లేదని చాటి చెప్పుదాం  || చదువు

రండి ఓటేద్దాం !!

 ఎన్నికైన పిదప ఎవరికీ కనరాక
పైరవీల కోట్ల పడగలెత్తి
ప్రజల బాగులేవి పట్టించుకోనట్టి
నాయకులకు ఓటు వేయతగదు

పదవి లేకున్న ఎన్నడు పాలుమరక
అందుబాటున తానుండి ఆదుకొనుచు
ప్రజలసేవకై నిత్యము పరితపించు
నాయకులకే ఓటు వేయవలను

అయిపు లేకపోయి అయిదేండ్లపుడు వచ్చి
పళ్ళికిలబెట్టి  పలుకరించి
అయ్యా, అమ్మా, మీరలంత బాగేయని
ప్రేమనొలక బోయు పెద్దలొద్దు

అలది కానివైన అవలీలచేయిస్త
చందమామ దించి ముందరుంచుత
ఒక్కసారి నాకు ఓటేసి చూడని
మాయజేయు వారి మాట వినకు

కులమతాలు, ప్రాంతకూటమి గావించి
విందులిచ్చి, త్రాగ మందు పోసి
నోటు చేతపెట్టి,ఓటు కాజేసెడి
నీతిలేని నేత వాత బెట్టు

నాన్నకు నివాళి !

 
నాన్నా ! నా కొరకై నీ
వెన్నో బాధలు భరించి యెంతో ప్రేమన్
కన్నులనిడి కాపాడిన
నిన్నే దైవముగ కొల్తు నిరతము భక్తిన్

ఆ దైవమెందుకొ పురిట
నా తల్లిని తన్నుకెళ్ళె నారునెలలకే !
నా దైవమీవె నాన్నా !
నీ దీవెనలిమ్ము నాకు నిండుగ నెపుడున్

నీతో ఆటలు,పాటలు,
నీతో గడపిన క్షణములు, నీ భాషణముల్
నీ తీయని జ్ఞాపకములు
నా తోడుగ నిల్పి నన్ను నడిపించుమయా

నీ ధైర్యసాహసములును,
నీ ధర్మపరాయణతయు, నీ భూతదయున్
నీ ధైవభక్తి,శ్రద్ధయు
కొంతైనను నాకొదువగ కోరితి వరమున్

కనులను నీ రూపము కన
వినులను నీ మృదువచనము విన,చేతల నీ
పనితనము, శ్రద్ధయు నిలిపి
నను కరుణను జూడగోరు నామది నాన్నా !

భాగ్యవిధాతలు

 బాలల్లారా ! భావి భారత పౌరుల్లారా !
భాగ్య విధాతలు మీరే - భారత
భాగ్య విధాతలు మీరే !!

ఏ గురువు వల్ల ఏకలవ్యుడంతటి విలుకాడయ్యాడు ?
ఏ చదువు వల్ల సిద్దార్థుడు బుద్ధప్రసిద్ధిని పొందాడు
మరువకండి విద్యాబుద్ధులే మీ ప్రగతికి సోపానాలు
మీ చిరునవ్వులే జాతికి చెరగని సిరిసంపదలు

ఏ మహిమ వల్ల గగనాల తారగ వెలగెను ధృవుడు
ఏ శక్తి వల్ల మృత్యువు నెదిరించె మార్యండేయుడు
ఆ మహనీయుల ఆదర్శంగా అడుగు ముందుకేయాలి
బాపు, చాచా, నేతాజీల బంగారు కలలు పండించాలి

స్త్రీమూర్తి

సృష్టి స్థితి లయకర్తలకే ఆధారమాదిశక్తియని
స్త్రీమూర్తని పూజించే పుణ్యభారతావనిలో
ఆడపుటకరిష్టమనే దుష్ట సాంప్రదాయమా
పుట్టినా బ్రతికి బట్టకట్టడమే గగనమా ?

                                                                                      || సృష్టి

తనువు మనసు నీదని తనవారిని వదలుకొని
దైవముగా నమ్మి నిన్ను దరిజేరిన అర్థాంగిని
కట్నమివ్వలేదని కాల్చిచంపుటే ధర్మం?
స్త్రీశోకం శాపమై దహించివేయు సర్వస్వం

                                                                                  || సృష్టి

పేగుతెంచి స్తన్యమిచ్చి పెంచిపెద్దచేయి తల్లి
ప్రేమపంచి బ్రతుకంతా ధారపోయు నీకె భార్య
తల్లిభార్యలేని బ్రతుకు తలపోయగ నీ తరమా?
స్త్రీమన్నన పొందు చోటే సిరులు దొరలు తెలుయుమా?

ప్రణయరాగం

అతడు:  ఏకాంత సమయము, ఇంకేల బిడియము ?
             అందించు అందము,  అలరించు డెందము

ఆమె:    కథలేవో అల్లకు, కౌగిళ్ళ చేరకు
            నా బుగ్గ గిల్లకు, నును సిగ్గు దోచకు

                                                                                  ఏకాంత||
అతడు:  అయ్యారె చిత్రము, ఆ కళ్ళే మంత్రము
             మురిపించు అందము, ముంగాళ్ళ బంధము

ఆమె:    కొంగుపట్టు  లాగకు, గుండె తట్టి లేపకు
            చెంప చెంప రాయకు, చిచ్చు నాలో రేపకు

                                                                                  ఏకాంత||
అతడు:  విరహాల వేడిలో కరిగేను కాలము
            నీ ప్రణయదాసుని కరుణించి బ్రోవుము

ఆమె:    ప్రణయానుబంధము, పులకించు హృదయము
           ఎంతెంత మధురము, దిగివచ్చె స్వర్గము

                                                                               ఏకాంత||

చెట్టు నాటుదాం మామా

చెట్టు నాటుదాం మామా
చెట్లు పెంచుదాం పిల్లా
చెట్టు నాటుదాం మామా
చెట్లు నాటుదాం పిల్లా
మన ప్రేమకు గుర్తుగా
మన పెళ్ళికి సాక్షిగా
పచ్చని చెట్టు నాటి పదిలంగా పెంచుదాం
పదిలంగా పెంచుదాం
                                                    || చెట్టు నాటుదాం
రాళ్ళను విసిరినా పళ్ళను రాల్చుతూ
చివురులు చిదిమినా పువ్వులు పూయుచూ
తరతమ బేధాలు తలపుకు రానీక
అందరినీ చల్లగా ఆదరించు చెట్టు తల్లి
                                                     || చెట్టు నాటుదాం
ఆహరమందించి పొషించు మనిషిని
మందుగా రూపొంది రక్షించు జీవుని
అవసరానికి ఆదుకొని తలపించు దేవుని
చేతులెక్కి మొక్కుదాం చెట్టు తల్లి దిక్కని
                                                      || చెట్టు నాటుదాం
ఇంటింటా చెట్టు ఇంటిముందు చెట్లు
వీధివాడ చెట్లు రహదారులందు చెట్లు
అడుగడుగున పచ్చదనం అందంగా దిద్దుదాం
ఆ తల్లి రుణం కొంతైనా ఈ తీరుగ తీర్చుదాం
                                                      || చెట్టు నాటుదాం

ఈ పాటను క్రింది లంకెలో వినండి

భాగ్యవిధాతలు

బాలల్లారా ! భావి భారత పౌరుల్లారా !
భాగ్యవిధాతలు మీరే,  భారత
భాగ్యవిధాతలు మీరే !

కాయగసురులు తిన్న బాలభరతుడు
కౄరమృగాల కోరలు దీసిన వీరుడు
కాఫీకల్చరుతో కళ్ళు తెరచు పిల్లలు
షోకేసు బొమ్మల్లా చేవజిక్కిపోయారా ?

ఏ గురువు వల్ల ఏకలవ్యుడంతటి విలుకాడయ్యాడు
ఎందరు బోధించినా మీరెందుకు కొరగాకున్నారు ?
మరువకండి, విద్యాబుద్ధులే మీ ప్రగతికి సోపానాలు !
మీ చిరునవ్వులే జాతికి చెరగని సిరిసంపదలు !

ఏ మహిమ వల్ల గగనాల తారగ వెలగెను ధృవుడు ?
ఏ శక్తి వల్ల మృత్యువు నెదరించె మార్కండేయుడు ?
ఆ మహనీయులు ఆదర్శంగ అడుగు ముందుకు వేయాలి
బాపూ, చాచా, నేతాజీల బంగారు కలలు పండించాలి