స్వాతంత్ర్యం వచ్చిందంటే

స్వాతంత్ర్యం వచ్చిందంటే నాడు
సంతోషంతో గంతులు వేశాను

అందరానిదేదో అరచేతికి చిక్కినట్లు
స్వర్గం దిగివచ్చి స్వాగతం పలికినట్లు
బ్రతుకు పండి పున్నమై పూసినట్లు
సంతోషంతో గంతులు వేశాను

రెక్కలు విప్పి రివ్వున నింగికెగసి పోవాలని
ఆసేతు హిమాచలం హాయిగ విహరించాలని
పచ్చని భూపొత్తిళ్ళలో వెచ్చగ పవళించాలని
సంతోషంతో గంతులు వేశాను -కాని

అర్థం అధికారం అతివా సాంగత్యం
పరమార్థంగా కల పెద్దమనుషుల స్వార్థం
పడగ విప్పి బుసలుకొట్టి  పిశాచాలై  పీక్కుతూంటే
అక్రమం అన్యాయం అంధకారమై అలముకుంటే

దగా  దోపిడి  దావానలమై  దరికొంటే
కులతత్వం మతమౌఢ్యం కరాళనృత్యం చేస్తూంటే
స్థలవాదం సమవాదాన్ని సవాలు చేస్తూంటే
మమత మానవత్వం మంటగలసిపోతూంటే

నోరు మెదపలేక కాలు కదపలేక
కాలే కడుపును కన్నీటితో తడుపలేక
పగిలిన గుండెను పొదివి పట్టుకొని
ఎందుకొచ్చిందీ స్వాతంత్ర్యమని ఏడ్వలేక చస్తున్నా !
ఎక్కడుందో స్వాతంత్ర్యమని దిక్కు దిక్కులు చూస్తున్నా !!