శ్రీ పరాభవనామ ఉగాది శుభాకాంక్షలు !

కడలియలయై పరాభవ కదిలి వచ్చె,
గతము దిగమ్రింగి కొంగ్రొత్త కాంతి దెచ్చె,
భవితపై యాశ చివురించి పరిఢవిల్ల,
సకలశుభములు కలిగించు సర్వులకును.

బ్రతుకుసారమంత పచ్చడిలో జూపి,
కష్టసుఖముల సమదృష్టి నేర్పి,
విజయమొందనాత్మ విశ్వాసమిచ్చు ను
గాది పండుగ యని ఘనత గాంచె.

గల్ఫులో చిచ్చు జగమంత కమ్ముకొనియె,
గ్యాసు పెట్రోలు లేక యిక్కట్టు లాయె,
రాకపోకలాగె పనులు లేకపోయే,
పొయ్యి వెలగక పస్తులు పోవు టాయె.

బలమదంబు హెచ్చ ప్రపంచ మేలదలచి,
కౄరదాడుల దేశాలు కూలగొట్టు,
ట్రంపు నణగించు ఘోర పరాభవమ్ము,
నీ పరాభవవత్సరంబిచ్చు కనుడి

క్రొత్త సంవత్సరము తీర్చు కోర్కె లెల్ల,
నాయు రారోగ్య సౌభాగ్య మంద జేయు,
దయయు ధర్మమ్ము చేబూను జయము కల్గు,
సంశయించక ముందుకు సాగి పొమ్ము.