నాన్నా ! నా కొరకై నీ
వెన్నో బాధలు భరించి యెంతో ప్రేమన్
కన్నులనిడి కాపాడిన
నిన్నే దైవముగ కొల్తు నిరతము భక్తిన్
ఆ దైవమెందుకొ పురిట
నా తల్లిని తన్నుకెళ్ళె నారునెలలకే !
నా దైవమీవె నాన్నా !
నీ దీవెనలిమ్ము నాకు నిండుగ నెపుడున్
నీతో ఆటలు,పాటలు,
నీతో గడపిన క్షణములు, నీ భాషణముల్
నీ తీయని జ్ఞాపకములు
నా తోడుగ నిల్పి నన్ను నడిపించుమయా
నీ ధైర్యసాహసములును,
నీ ధర్మపరాయణతయు, నీ భూతదయున్
నీ ధైవభక్తి,శ్రద్ధయు
కొంతైనను నాకొదువగ కోరితి వరమున్
కనులను నీ రూపము కన
వినులను నీ మృదువచనము విన,చేతల నీ
పనితనము, శ్రద్ధయు నిలిపి
నను కరుణను జూడగోరు నామది నాన్నా !
0 comments:
Post a Comment